नेपाली हास्यव्यङ्ग्य अनलाइन पत्रिका

संप्रस पौडेल :

बाहुनले कुखुरो खान हुन्न
प्याजको नेप्से यसरी बढ्यो
मासुमा मासु जत्तिकै
प्याज हाल्नु परेपछि
ठीकै भनेका हुन् बुढापाकाले
बाहुनले प्याज छुन पनि हुन्न ।

‘प्याक’ छोड्ने चिज पाइन्छ,
गुट्खा तोड्ने जडिबुटी पाइन्छ
दिनदिनै उमेर ढल्कँदै गएपछि
थोत्रा मान्छेहरूको कुरा गढेको हो
प्याजको भाउ होइन बरू
मेरो लाजको भाउ बढेको हो ।

व्यापारीहरू विज्ञापन गराउलान्
प्याजमा ओमेगा पाइन्छ ।

बलिउडको हिरोले भन्ला-
उठेगा खाइन्छ, बसेगा खाइन्छ ।

कलिउडकी हिरोइन भन्ली-
प्याज निदाउन चाहिन्छ, ब्युँझन चाहिन्छ ।

पत्रकारले लेख्ला-
प्याज रहस्य हो, रोचक हो ।
सम्पादकले सच्याउला-
प्याज ऐतिहासिक द्योतक हो ।

डाक्टरहरू सिफारिस गर्लान्-
प्याजले शरीर सुगठित बनाउँछ ।

उद्योगपतिले दिमाग लाउला-
प्याजका स्वादमा चकलेट बन्लान्
पिरो प्याज चिप्स बन्लान्
अमिलो प्याज चाउचाउ बन्लान्
मगमग प्याज कुरमुरे बन्लान्
तिनले
एउटा डाक्टरलाई विज्ञापन गराउलान्
भनाउलान्
– प्याजले मुटु बलियो हुन्छ
– प्याजले फोक्सो रसिलो हुन्छ
– प्याजले किड्नी कसिलो हुन्छ
– प्याजले दिसा सजिलो हुन्छ

प्याजको भाउ बढेदेखि हजुर्बाको सूत्र मान्दैछु-
बाहुन भएकैले अब तरकारीमा प्याज खाइन्न
ए अल्छे तिघ्रो स्वादे जीब्रो,
ताली बजाएर डुक्री डुक्री प्याजगान गाइन्न
अङ्गुर अमिलो भएजस्तो,
मास्टरसाप,
प्याजमा कुनै भिटामिन पाइन्न ।

०००
हेटौँडा- ५