नेपाली हास्यव्यङ्ग्य अनलाइन पत्रिका

सुरज साउद :

यो देश तपाइँ को पनि त हो श्रीमान
नेताहरूले मात्रै कहाँ सक्न पाइन्छ र ?
तपाईंको भागमा पर्ने हिस्सा त
तपाईंले नै सक्न पाउनु पर्‍यो नि होइन र ?

अपाङ्ग बनाएर
राज्यका सवै अङ्गहरू
घगडान नेताहरूले
शक्ति जति सवै
इजलासमा बुझाएकै छन्

सर्वाधिकार सम्पन्न भएको बेला
प्रभुहरूलाई खुशी पार्ने
यो भन्दा उपयुक्त अवसर
सायदै आउला श्रीमान
स्वर्ग त तपाईंलाई पनि त जानु छ !

सर्वोच्च न्यायालयको शक्ति प्रयोग गर्नुस्
र, जसो गर्दा प्रभूको आशिर्वाद प्राप्त हुन्छ
त्यस्तै फैसला गर्नुस्
आखिर अन्तिम व्याख्याता तपाई नै हो
आखिर हामी रैती न हौं ?
प्रश्न उठाउने अधिकार राख्दैनौ क्यारे !
चुपचाप सहिदिउँला श्रीमान !

देश र जनताको केही चिन्ता नलिनुस् श्रीमान
त्यो काम पशुपतिनाथलाई छोडिदिनुस्
तपाईं आफ्नो भलाई हेर्नुस्
जे गर्दा प्रभूको आशिर्वाद प्राप्त हुन्छ
र, चाँडै स्वर्ग जान पाइन्छ
त्यस्तै फैसला गरिदिनुस् … श्रीमान !!

संविधानका धारा हेर्नुस्
कानुनका दफा हेर्नुस्
दक्षिण वा उत्तर जता फर्किनु छ फर्किनुस्
जे गर्दा अस्थीरता बलियो हुन्छ
जे गर्दा देश असफल हुन्छ
त्यही फैसला गर्नुस् श्रीमान !

निर्वाचन हुनै नसक्ने अवस्था देखेमा
मिति तोकेरै निर्वाचन गर्नुपर्ने फैसला गरिदिनुस्
कसैको सरकार बन्न नसक्ने अवस्था देखेमा
संसद व्युँताइदिनुस्
जे गर्दा देश असफल हुन्छ
त्यही फैसला गरिदिनुस् श्रीमान !

को प्रधानमन्त्री हुनु पर्ने हो,
को नहुनु पर्ने हो
मन्त्री को हुनुपर्ने हो, को नहुनु पर्ने हो,
त्यो पनि फैसला ठोकिदिनुस् श्रीमान
घघडान नेताहरूले अधिकार जति
अदालतलाई बुझाएकै छन्

अरु-अरुले कोमामा पुर्‍याएको देशलाई
आर्यघाट पुर्‍याइदिनुस् श्रीमान
आखिर तपाईं पनि त
सतीले सरापेकै देशको न्यायमूर्ति त हो नि ..!

०००
अछाम