नेपाली हास्यव्यङ्ग्य अनलाइन पत्रिका

डा. बमबहादुर जिताली :

दिनदिनै भन्सारमा सुन फलेको छ
तर पनि अभावको राँको बलेको छ ।
विदेशको सुनचाँदी आएको छ राम्रो
किन झनै समस्याको पहाड छ हाम्रो ?

महँगीले जनताको बल्न छाड्यो चुल्हो
व्यापारी झन् बनेको छ नेताभन्दा ठूलो ।
गरिबको छातीभित्र फुट्छ ज्वालामुखी
चम्चागिरी गर्नेहरू भएका छन् सुखी ।

नेता सबै ठूला बन्छन् लुला छैनन् कोही
चम्चेहरू मोज गर्छन् अरू बस्छन् रोई ।
हिजो-आज नेपालीको गिर्दो अवस्था छ
राँगा, बोका, साँढेलाई फिर्दो व्यवस्था छ ।

कमिसन-तन्त्रीहरू मन्त्री हुने गर्छन्
मनपरी तन्त्र गरी घ्याम्पे भुँडी भर्छन् ।
जताततै विकृतिको सगरमाथा उठ्यो
नेपालीको पीर-मर्का भन कहाँ छुट्यो ?

तस्करको लस्करले डाँडो नाघेको छ
अपराधी फटाहाको खाँडो जागेको छ ।
कतै पनि भेटिएन उन्नतिको मति
समाचार सुन्दा लाग्छ- भयो समुन्नति ।

०००
नागार्जुन-१, रानीवन, काठमाडौं
९८४१४९१०८१