नेपाली हास्यव्यङ्ग्य अनलाइन पत्रिका

गायत्री परिरोशनी :

म गणितको विद्यार्थी
मानौं एक्स बराबर वाई
धेरै ठाउँमा पढेँ ,
यहीलाई मानेर
धेरै हिसाब गरेँ
अब टाई र सुट बराबर
धेरै कुरा किन नपढ्ने ?

टाई र सुट बराबर
पजेरो, चिल्ला र महङ्गो गाडी
झण्डा भएको गाडी
डण्डा भएको गाडी
कोट, पाइन्ट, दौरा र सुरुवाल
सारी — ब्लाउज, चौबन्दी र फरिया
सिंहदरबार, बालुवाटार, बानेश्वर
सात प्रदेश र ७५३ स्थानीय तह ।

म बराबर मजस्तै सबै— सबै
निकै मज्जा छ, निकै काइदा छ,
निकै फाइदा छ
टाई र सुटले भ्रष्टाचार गरे पनि
कसैले देख्दै, देख्दैनन्,
खरबौँ झ्वाम्म खाँदा पनि
मिडियाले लेख्दै लेख्दैनन् ।

टाई र सुटले नीति बेच्छ,
इमान र प्रतिष्ठा बेच्छ,
अलिकति देश बेच्छ,
अलिकति भेष बेच्छ,
अलिकति अरुका बेच्छ,
अलिकति आफ्ना पनि बेच्छ,

अँ हँ हामीले केही बेचेको देख्दैनौँ ।
अनि हामीले नै टाई र सुटलाई
मान गर्छौ, सम्मान गर्छौ ।
पूजा गर्छौ र फूलपाती चढाउँछौँ ।
दामी दोसल्ला ओढाउँछौँ ।

टाई र सुटले,
विवेक मार्छ
सिद्धान्तलाई मार्छ,
गरिबलाई मार्छ,
एकल, असहायहरुलाई मार्छ,
आवाजविहीनहरुलाई मार्छ,
इमान र निष्ठालाई मार्छ,
न्यायलाई मार्छ,
समता र समानतालाई मार्छ,
आत्मनिर्भर र सशक्तीकरणलाई मार्छ ।

तर पनि,
हामीले टाई र सुटलाई,
माया गरिरहन्छौं ।
टाई र सुट मर्छ कि भनी,
खाली सिलिण्डरमा,
अक्सिजन भरिरहन्छौं ।
मात्र टाई र सुटलाई
आफ्नो अमुल्य मतदान दिन्छौँ ।
हरेकले आफ्नो मृत्युसँग
टाई र सुट किनिरहन्छौँ ।

०००
स्याङ्जा