नेपाली हास्यव्यङ्ग्य अनलाइन पत्रिका

डा. बमबहादुर थापा (जिताली) :

अत्याचारी अकुत लुटमा सर्म छाडेर आयो
भ्रष्टाचारी गति र मतिमा घूस भारी बजायो ।
गाईजात्रा प्रतिदिन गरी अङ्ग नाङ्गो बनायो
जात्रा हेरी मुलुकभरमा लाज आफैँ लजायो ।

खाँदा खाँदै घर शहरमा नाक छोप्ने बनायो
नाकै काट्यो प्रतिनिधि बनी नाच नाङ्गो नचायो ।
तन्नेरीको बल र पसिना पारि कल्ले पुर्‍यायो ?
देखी जात्रा सदनतिरको लाज आफैँ लजायो ।

जोजो हुन्छन् सुन, जमिनका धुन्दुकारी अघोरी
बन्छन् आफैं झटपट गरी न्यायकर्मी विचारी ।
जल्ले पायो लटपट गरी भाग ठूलो बजायो
हेदहिर्दै विविध घटना लाज आफैँ लजायो ।

नेपालीको परिचयसँगै शान कल्ले बिकायो ?
गाई मारी कुकुर, चितुवा बन्न कल्ले सिकायो ?
साझामैत्री मुलुकहितको शान्ति कल्ले भजायो ?
पाखण्डीका छलकपटले, लाज आफैँ लजायो ॥

गोर्खालीको पहुँच नबुझी हेप्न कल्ले लगायो ?
नेपालीको प्रखर गरिमा, स्वप्न कल्ले भगायो ?
हामी नै हौँ भुवनभरिका वीर ! जल्ले जनायो
देखी नेता हरिपसरिका ! लाज आफैँ लजायो ।

०००
नागार्जुन न.पा.-१, रानीवन, काठमाडौं,