नेपाली हास्यव्यङ्ग्य अनलाइन पत्रिका

गायत्री परिराेशनी :

बेइमान जाडो
मान्छे खाने भोक लागेपछि
मासु बढ्यो भनेर
डाइटिङ गर्नेलाई खानु ।
मसल बढाउने भन्दै
जिमखानामा,
फाइटिङ गर्नेलाई खानु ॥
सुट,बुट र टाई लगाएर
सरकारी पैसोमा
विदेश घुम्नेलाई खानु ।
चुनावको बेला,
मिठा—मिठा भाषणमा
दुर्गमको विकास चुम्नेलाई खानु ॥

राम्रो भाऊ पाउँदा
देश बेच्ने नेतालाई खानु ।
जति खाए पनि
कहिल्यै नअघाउने
कर्मचारीलाई खानु ॥
पीडितलाई दिएको राहत
चोर्नेलाई खानु ।
सदाचार र नैतिकताको
चापी फोर्नेलाई खानु ॥

कहिल्यै पेटभरि,
खान नसकेका ।
पटक—पटकको भूकम्पले
लान नसकेका ॥
दश औँला खियाँउदा
हातगोडामा जाली परेका ।
भारी बोक्दा—बोक्दा
थाप्लोमा थाली परेका ॥
उमेरमै सबै दाँत झरेका
राज्य र सरकारले कहिल्यै नदेख्ने
तीनै दुर्गमका, सर्वपीडितहरुलाई
बर्षेनी किन खान्छस् ?
ए ! बेइमान जाडो ।

०००
स्याङ्जा