नेपाली हास्यव्यङ्ग्य अनलाइन पत्रिका

नारायण भट्टराई :

अरुले उचाली दिएर
अग्लो ठाउँमा पुगेको
अरुले लडाइ जितिदिएर
विजयी भएको
म ठूलो मान्छे ।

अरुले कमाएको सम्पत्तिमा राज गरेर
कुबेर बनेको
कुबेर नै कुबेरको कथा
पैसाको कापीमा लेखेर
साहित्यकार भएको
म ठूलो मान्छे ।

आफ्नै नाममा संगठन खोलेर
त्यसको अध्यक्ष बनेको
म ठूलो मान्छे
दौडमा प्रतिस्पर्धीलाई
छिर्के लगाएर लडाइ
विजेता बनेको म ठूलो मान्छे ।
आफैँले प्रायोजन गरेको सम्मान कार्यक्रममा
आफैँ सम्मानित भनेको
म ठूलो मान्छे ।

मेरै पसलबाट
मेरै गोजीका मान्छेले
चन्दा उठाएको पैसाले
किनेको खादा ओडेर
समाजसेवी भएको
म ठूलो मान्छे ।

०००
हाल अमेरिका