नेपाली हास्यव्यङ्ग्य अनलाइन पत्रिका

गायत्री परिरोशनी :

हामी नेता—हाम्रा नेता
सबै महान् छौँ ।
त्यसैले,
विकासका वाचा र प्रतिवद्धतालाई
एकै पटक हान्न सक्छौँ ।
देशकै मुटु —कलेजो खानेलाई
अमूल्य भोट दिएर छान्न सक्छौँ ।
थिति, विधि र पद्धति बेच्नेलाई
ठूलै उपलब्धी मान्न सक्छौँ ।

सदाचार र नैतिकता भन्ने कुरो
कहिले सिँगापुर त
कहिले स्विजरल्याण्ड पुग्दा
निर्यात व्यापार फस्टायो भनेर
जान्न सक्छौँ ।
अधिकार र कर्तव्यका मिठा भाषणलाई
दण्डहिनता फुराएर झान्न सक्छौँ ।
लाज सरम पचाएर
आफैले थुकेको थुक
चाट्न सक्नेलाई,
प्रगतिको छलाङ् ठान्न सक्छौँ ।

चुनावको बेला,
सबै गर्छु भन्ने आश्वासनका
कौडी बाँडेर,
अमूल्य मत सधैँभरी तान्न सक्छौँ ।
हामीलाई आफूभन्दा,
आफ्ना नेता प्यारो लाग्छ ।
नेताको दर्शन पाइयो भने
अन्य सबै दर्शनका कुरा भाग्छ ।
महान् बन्नलाई,
कसैले गर्न नसक्ने बात गर्नुपर्छ ।
कसैले गर्न नसक्ने घात गर्नुपर्छ ।
जय होस, हामी महान्
अनि हाम्रा नेता महान् ।

०००
स्याङ्जा