नेपाली हास्यव्यङ्ग्य अनलाइन पत्रिका

डा. बमबहादुर थापा ‘जिताली’ :

वर्तमान छ भुक्तमान ।
एसियाको सर्वोच्च सम्मान ॥

छुचुन्द्राको टाउकामा चमेलीको तेल
चमेराको बथानमा चल्यो ठेलम्ठेल ।
भाङ्ग्रालाई सयपत्री फूल भयो धेर
सदनमा चर्चा चल्यो बल्ल यतिखेर !!

नाइकेले लुटानामा पाल्सी कुरा गर्छन्
यनकेन प्रकारेण आफ्नै भुँडी भर्छन् ।
नाइके र टाउकेले मुलुक नै लुटे
ज्यानमारा अपराधी लुटेपछि छुटे ॥

नीति लिए मोटाउने, आफैँ हुने धनी
युवा गए परदेश कमाउन भनी ।
देश बन्यो बृद्धाश्रम, गरिबमा पहिलो
नेता बने धुन्दुकारी, भ्रष्टाचारी थैलो ॥

हिजो थियो शान्तिक्षेत्र, आज कुरुक्षेत्र
तस्करको केन्द्र बन्यो राजनीति-क्षेत्र ।
करमाथि कर तिरी जनता छन् नाङ्गो
नेताहरू बोल्छन् सधैँ मर्मभेदी बाङ्गो ॥

खोरियाको घैयाधान कोरियामा जान्थ्यो
भारत र भुटानले बेसाएर खान्थ्यो ।
आज हामी विदेशको बेसाएर खान्छौँ
परजीवी नेतालाई गणतन्त्री ठान्छौँ ॥

विदेशीको इसारामा धर्मसर्म फाले
लाज पनि लजाउने कर्म गर्न थाले ।
कस्तो थियो संसारमा गोर्खालीको सान
टिठलाग्दो बनेको छ हाम्रो पहिचान ॥

०००

नागार्जुन न.पा.-१, रानीवन, काठमाडौँ
९८४१४९१०८१