नेपाली हास्यव्यङ्ग्य अनलाइन पत्रिका

उषा गुरूङ :

कहिले बैठक कहिले सेमिनार
कहिले गोष्ठी कहिले उद्घाटन
जताततै पुग्नु पर्ने
टेबलमाथि पत्रहरूको खात
लम्पसार परेर छरिएर
बसेका छन्
यता टेलिफोन र मोबाइलमा
आफ्नो कान र मुख जोडिएर
बस्नु पर्ने
हरे शिव !
साह्रै बेफुर्सदी भइएछ
न घरमा खाना खान फुर्सद
जहा पुग्यो त्यही जे छ
सम्मान स्वरूप ग्रहण गरियो
यति मात्र होइन
रातमा निँदले छोपेको बेलामा
पनि टेलिफोनको घन्टी
बज्दा झन् साह्रो पार्ने
मोबाइल त स्विच अफ गरिन्छ
टेलिफोन त त्यसो गर्न मिलेन
नभन्दै रिसिभ गरिएन भने
भोलि आफ्नै कानले दुःख
भोग्नु पर्ने
हरे शिव !
जिन्दगीमा के रोजियो रोजियो
खोजिएको कुरो त भेटियो
तर,
चैनमा बाँच्न चाहिँ
निकै हम्मे हम्मे पर्ने भयो
ठीकै छ समयलाई त
सलाम ठोक्नै पर्छ
नत्र भाग्यले जुराएको यो
मौका आज कहाँ पाइन्छ ?
जे छ, ठीकै छ
आलिसन महल, टोयटा, मर्सिडिज
सबै सम्पन्नताले भरिएकोमा
आनन्द छ ।
ठाउँमा पुग्या भएर पुरै आशा
पुगेको छ प्रभु ।
कहिले नेताको घाँटीमा फूलको माला
कहिले जुत्ता पहिरिने त छँदै छ ।

०००
झापा