किनकी उनीहरू मान्छे होइनन्

किनकी उनीहरू मान्छे होइनन्

नजाने गाउँको बाटो सोधी हिँड्दैनन् बरू आफू रुन्छन् आफ्नो अन्न दातालाई रुवाउँदैनन् नियमको पालना गर्छन् आफूले नजाने पनि कुकुरले भनेको मान्छन् किनकी, उनीहरू मान्छे होइनन् ।

नारायण भट्टराई

नारायण भट्टराई :

कुकुरहरू
आज्ञाकारी हुन्छन्
दिएको खान्छन्
देखाएर खान्छन्
आजको लागी खान्छन्
आफ्नो लागी खान्छन्
अरु अगाए पछि उब्रिएको खान्छन्
छिमेकमा हड्डी खान पाइए पनि
बास बस्न आफ्नै घरमा आउँछन्
आफूले नुन खाएको
आफूले बास पाएको
घर प्रति सधैँ बफादार हुन्छन्
कसैको एक्लो पनाको साथी हुन्छन्
तर, बलात्कार गर्दैनन्
भुक्छन् अनि टोक्छन् पनि
तर टोकाउँदैनन्
कसैको दुखको कथा सुन्छन्
तर त्यसको फाइदा उठाउँदैनन्
मर्यादाको सिमा नागेर
कर्तव्य बाट भागेर
एउटाको पक्षमा लागेर
अरुको कुभलो गर्दैनन्
तालिम प्राप्त गरे पछि
आफ्नो सिमाको क्रमभङ्ग हुने
काम गरेर कहिलै
कलङ्कित हुँदैनन्
नजाने गाउँको बाटो सोधी हिँड्दैनन्
बरू आफू रुन्छन्
आफ्नो अन्न दातालाई रुवाउँदैनन्
नियमको पालना गर्छन्
आफूले नजाने पनि
कुकुरले भनेको मान्छन्
किनकी, उनीहरू मान्छे होइनन् ।