नेपाली हास्यव्यङ्ग्य अनलाइन पत्रिका

अच्युतप्रसाद खतिवडा ‘तिर्पाली काइँलो’ :

अराजकता मँहगी र बेरोजगारी
अलिकति मिसाउ, समाजमा गर्ने चाकरी
यसलाई साम्प्रदायिकताको जाँतोमा पिसाऊ
अलिकति बेइमानी पनि, त्यसमा मिसाउ ।

त्यसलाई जातिवादको तेलमा भिजाएर
आतङ्कवादको घाममा खरो हुनेगरी सुकाऊ
गरिबी र अनिकालको कराहीमा हालेर
त्यसमा नगदी घुसको चास्नी मिसाऊ ।

झुठो आश्वासनको नसा हालेर
लुते र कमजोर प्रशासनको रङ चढाऊ
आरोप प्रत्यारोपको दुई थोपा सुगन्ध हाली
सबै मिश्रणलाई राम्ररी हल्लाऊ ।

त्यसपछि भ्रष्टाचारको साँचोमा हालेर
यसका साना साना गोली बनाऊ
त्यो गोली बिहान बेलुका, झुठ बोली सकेपछि
दुई दुई गोली दुई पटक राम्ररी चपाएर खाऊ ।

यो सेवनको केही दिनपछि आफैमा महान् परिवर्तन पाउने छौ
तिमीमा ती नेताका सबै गुण आउने छन्
तिमी समाजमा एक प्रतिष्ठित र
निष्ठावान् नेता कहलाउने छौ ।

०००
विराटनगर