नेपाली हास्यव्यङ्ग्य अनलाइन पत्रिका

लक्ष्मण नेवटिया :

१
किन बस्नु त्रासमा भइ उदास,
जिन्दगीमा होस् हास परिहास।
किन बस्नु यो थुतुनो किच्याएर,
हुनुपर्छ सधैं अतुलित उल्लास ।

२
जिन्दगी हुनुपर्छ जोशको प्रसंग
देखियोस् मुहारमा खुसी छर्लङ्ग
इष्टमित्र परिवार पनि परुन् दंग
प्रत्येक क्षण जागृत रहोस् उमंग।
किन बस्नु त्रासमा भइ उदास,
जिन्दगीमा होस् हास-परिहास।

३
सुख मात्र होइन दुख चाहिन्छ
सुख मात्र चाहँदा दुख पाइन्छ
कसैले बढी गन्दैमा लोभ किन,
कसैले केही भन्दैमा क्षोभ किन ?
किन बस्नु त्रासमा भइ उदास,
जिन्दगीमा होस् हास-परिहास ।

४
जब जब राख्छौं बढीअभिलाषा,
हात लाग्छ सुन्नाअर्थात निराशा ?
राखी शिष्ट सरल सन्तुलित भाषा
अहम् ब्रह्मास्मि आफ्नो परिभाषा
किन बस्नु त्रासमा भइ उदास,
जिन्दगीमा होस् हास-परिहास।

५
जीवनको यात्रा उकाली ओराली
कहिले प्रशंसामा गुंजिएको ताली
कहिले मुख छाडेर दिन्छन् गाली
मायाप्रेम जताततै होस् यसपाली।
किन बस्नु त्रासमा भइ उदास,
जिन्दगीमा होस् हास-परिहास।४।

०००
विराटनगर