नेपाली हास्यव्यङ्ग्य अनलाइन पत्रिका

भाेजराज रेग्मी मुखाले

वर्षमा एकदिन स्वाङ सिउरेर
“टोपीदिवस” मनाउँछौँ हामी
पेन्टमाथि ईगो बेरेर
“धोती दिवस” पनि कराउँछौ हामी
दर्शकले उधुम मजा मानेको ठानेर
आफ्नै छालासमेत काढेर गज्जब रमिता गराउँछौ
जाबो एउटा औँठीको लागि सिंगै डुँडुलो चढाउँछौ
नाथे एउटा मालाको लागि आफ्नै गर्दन लडाउँछौँ ।
हामी भूपीका बुद्धू बहादुर
हामी गणेशमानका भेडा
हामी छिमेकीका छौँडा
आफ्नै मात्र शुभलाभ ताकेर
हामी ढुकिरहन्छौँ गौँडा – गौँडा ।
आफ्ना रीतिरिवाज र संस्कारलाई
रुढीवादी र फजूल सम्झिन्छौँ हामी
अर्काको विसंगति, विकृति र विकारलाई
अत्यावश्यक र भिटामिन ठान्छौँ हामी
हामी अर्कैको कट्टु, अर्कैको ईंजार
हामी अर्कैको दर्जी, अर्कैको मिजार
हामी अर्काको भक्त र दानी पनि छौँ
र त आफ्नै टाउको काटेर
मालिकलाई मुकुट लाइदिन्छौँ
हामी अचाक्ली अनुशासित र ज्ञानी पनि छौँ
र त आफ्नै लगौँटी खोलेर
नाङ्गो बादशाहको स्वागतमा तोरण फहराइदिन्छौँ ।
हैन, लगौँटी दिवस खै ??

०००
भक्तपुर