नेपाली हास्यव्यङ्ग्य अनलाइन पत्रिका

घनश्याम रेग्मी :

रम्घाको रमणीय आँगन चुनी आषाढ उन्तीसमा
भाषा सेवकको पदार्पण हुँदा बेंसी खुसी खासमा
जे जस्तो पहिले परिस्थिति थियो उस्तै छ भाषा सब
भाषा हार्दिक पार्न यो भुवनमा हे भानु आऊ अब ।।१

नेपाली जन अग्रको गमनको गर्दै थिए चाहना
भाषा माध्यम मानियो र यसले पूरा गर्‍यो भावना
नेपाली पनको अभाव किन झन् बढ्दै गयो केशव
भाषाको महिमा उठाउन छिटो हे भानु आऊ अब ।।२

खोज्छन् उम्रिन आँकुरा प्रगतिका पाखा पखेरातिर
हाम्रो चेतन बिन्दुको नव लता मोडिन्छ अर्कोतिर
माटो प्रेम जगाउने विषयमा हामी जुटौँला सब
बत्ती उच्च विचारको सँग लिई हे भानु आऊ अब ।।३

पुर्खाका सपना थिए मुलुक यो होस् फूलबारी सरी
सादा जीवन देश प्रेम सपना भज्दै रमा श्री हरि
लागोस् चिन्तन रामका पद भनी बिर्सी बसेका सब
हो रामायण लेख्न गाउन भनी हे भानु आऊ अब ।।४

भाषाको छ बिजोग आज गहिरा खाल्डा परेका यहाँ
नौला ज्ञान विकास छैन यसमा हेप्छन् छिमेकी जहाँ
यस्तो दीन दशा सपार्न छ यहाँ लागौँ कि जम्मै सब
केही गर्न ढिलो भयो मुलुकमा हे भानु आऊ अब ।।५

आफ्नै भेष र भाषिका लडिरहे होला र के उन्नति
आआफ्ना गतिला अरू सब निचा भन्ने भयो संस्कृति
लौ आन्दोलन थालनी अब गरौँ भाषा बचाऊँ सब
भाषाको महिमा छ गाउन जुटौँ हे भानु आऊ अब ।।६

०००
भरतपुर- ५ विकास चोक, चितवन