नेपाली हास्यव्यङ्ग्य अनलाइन पत्रिका

डा. बमबहादुर थापा जिताली :

गर्दथ्यो सेवा है हनुमान’ राम र सीताको
तिमीले सेवा गर्दछौ ऐले वा-नर नेताको ।
छत्तीसपल्ट छानामा चढी आवाज उठायौ
वानर भेला विशाल पार्यो दानव जुटायौ ॥

सुग्रीव-सेना भएर जम्मा त्यो लाखुटारमा
विचित्र लीला देखाइदियौ त्यो शुक्रवारमा-
लौ भन कति पायौ त भत्ता सुग्रीव- हातको
लौ भन कति धोक्यौ त सुरा जर्मन-जातको ?

राणाको अघि चाकडी गर्थ्यो धनुझै नुगेर
पञ्चको पनि चाप्लुसी गर्यो घरैमा पुगेर ।
कृष्णको सेवा- सुसार गर्थ्यौ भक्तिका रसमा
सुग्रीव सेवा गर्दछौ ऐले शक्तिका वशमा ॥

चाकडीमाथि चाप्लसी गर्न परेनौ पछाडि
जुनसुकै तन्त्र आउँदा पनि तिमी छौ अगाडि ।
सुशीलदेखि विद्रोहीसम्म चरित्र हजार
हे हनु‌मान । तिम्रै छन् दिन, तिम्रै छ बजार ॥

काँचुली फेर्दै खेल्दछौ तिमी नौटङ्गी नाटक
तीनछक पर्छन् नाटक हेर्ने, नेपाली पाठक ।
महिमा तिम्रो को लेख्न सक्ने ? महङ्गी बढ्‌दो छ
नेपाली जन, जीवन-धन, महिमा गड्दो छ ॥

अपार गाथा गाउन सबले पुजारी तिमी हौ
चौबीसे घन्टा चाकडी गर्न तयारी तिमी छौ ।
चालीसभन्दा बढी छन् तिम्रा घचिला उखान
है हनुमान ! सकिन्न तिम्रो गरेर बखान ॥

०००
रानीवन, काठमाडाैं