नेपाली हास्यव्यङ्ग्य अनलाइन पत्रिका

हाेमनाथ घिमिरे :

जाग्दैछन् कसरी युवा मुलुकका को सक्छ रोक्नै अहो !
आँधीतुल्य विरोधको जुलुस यो को सक्छ छेक्नै अहो !
आए शिक्षितवर्ग जो सडकमा सम्पूर्ण ढाक्दै छ है !
भ्रष्टाचार विरुद्ध युद्ध छ अहो इन्साफ माग्दै छ है !

वर्षौँ वर्ष बित्यो बसेर पदमा हालीमुहाली गरे ।
खोक्रो राष्ट्र भयो रहेन अघि झैँ खुम्च्यो प्रतिष्ठा हरे !
सिङ्गो राष्ट्र चिरा चिरा छ अहिले अस्तित्व खै देशको ।
शङ्का लाग्छ सबै दलाल दलका गर्लान् लिलामी अहो !

सीमा साँध हरेक रात दिनमा मिच्छन् छिमेकी यहाँ ।
बोल्दैनन् तर यी बसेर पदमा नेता बिक्यो देशमा ।
मर्दैछन् अहिले युवा अरबमा खाडी बन्यो बाध्यता ।
छैनन् ध्यान कुनै अझै दमनमा उत्रिन्छ सत्ता यता !

रोकिन्नन् जसरी थुनेर सरिता चट्टान आओस् त्यता ।
छेकिन्नन् नभका शशी- रवि कतै यो व्यर्थको धृष्टता ।
लम्किन्छन् बनमा सिकार छ जहाँ निश्चिन्त छन् शार्दूल !
आगो हो अब जल्छ जल्छ खलको पोल्नेछ छाती तल ।

पर्ख्यौँ हुन्छ कि वा; भनेर दशकौँ हाम्रो बित्यो जिन्दगी ।
छैनन् आश अझै सबै भ्रम थियो फैल्यो यहाँ गन्दगी ।
टिक्ने छैन कदापि भोलि यसरी पापिष्ट ढल्दैछ है !
तानाशाह जराे उखेल्न अहिले, सङ्ग्राम चल्दैछ है !

०००
भरतपुर चितवन
२३ भाद्र २०८२