नेपाली हास्यव्यङ्ग्य अनलाइन पत्रिका

हिरा भट्ट “बदमास नम्बर दुई” :

केरा खान्छु भनी निवेदन दिने हुन्छन् कहाँ बाँदर
लाग्छन् बाँदरमा कहाँ हतकडी थुन्छन् कहाँ बाँदर
बोल्दै बोल्दिनँ बोल्नसक्छ कसले सत्ता उनैको हुँदा
बस्छन् कानुनमाथि बाँदर भनी बाङ्गो छ मेरो बुँदा
।१।

चोरी गर्न भुलेर बाँदर कहाँ बस्लान् सदाचारमा
भोग्लान् जेलसजाय बाँदर कहाँ हत्या बलात्कारमा
पोल्दै पोल्दिनँ पोल्नसक्छ कसले भत्ता उनैको हुँदा
बस्छन् कानुनमाथि बाँदर भनी बाङ्गो छ मेरो बुँदा
।२।

नाङ्गै हिँड्न लजाउने किसिमका होलान् कहाँ बाँदर
माथा वा मुटु ॐपवित्र जलमा धोलान् कहाँ बाँदर
देख्दै देख्दिनँ देख्नसक्छ कसले जत्था उनैको हुँदा
बस्छन् कानुनमाथि बाँदर भनी बाङ्गो छ मेरो बुँदा
।३।

साँच्चै दीन किसानका पिरहरू चिन्छन् र के बाँदर
सच्चा शासनकी सुशासन परी दिन्छन् र के बाँंदर
चिन्दै चिन्दिनँ चिन्नसक्छ कसले पत्ता उनैको हुँदा
बस्छन् कानुनमाथि बाँदर भनी बाङ्गो छ मेरो बुँदा
।४।

बुझ्ने बुझ्छ सरस्वती कलमको सन्देश होला जुन
बाङ्गा बाँदरमाथि बस्न बलियो बन्ला र के कानुन
बोलेँ बोल न बोल्नुपर्छ सबले आमा धुरुक्कै रुँदा
बस्छन् कानुनमाथि बाँदर भनी सोझो छ मेरो बुँदा ।
।५।

०००
बैतडी