नेपाली हास्यव्यङ्ग्य अनलाइन पत्रिका

प्रा. कपिल अज्ञात :

न बिर्सन सकिन्छ हत्या हिंसा
न मूर्तिहरूको चोरी न लाउडा धमिजा
न यति ओम्नी न ललिता निवास
नगरिदिनु स्टेट न भुटानी शरणार्थी खरिद बिक्री
न एनसेल प्रकरण
विगतदेखि वर्तमानसम्मका
सारा यी काण्डैकाण्ड बिर्साएर
सुन्ने सहनशीलतामा आउने
यहाँ कुन प्रणाली छ ?
बताउनुहोस् महोदयहरू !
नाराजुलूस पनि व्यापारिक विज्ञापन हुन थालेपछि
कुन आन्दोलन र कुन क्रान्तिले
जीवनको दशा फेरिन्छ ?
समाजकाे दिशा बदलिन्छ !

आशाहरू तुहिंदै र सपनाहरू भत्किदै गएपछि
कुन योजनामा फलीभूत हुन्छ र !
सङ्घर्ष पनि कुन उद्देश्यले अघि बढ्न सक्छ
जो चट्टानमै ठडिएका अभिमानहरू
आँधी र तुफानभन्दा पनि महाशक्तिशाली
भूकम्पले एकसाथ चूर्ण नभएसम्म
वा समग्रतामा डढेलो नलागेसम्म
विश्वासको जगमा इतिहासको
अभेद्य किल्ला कसरी निर्मित हुन्छ ?

०००
कविता क्षितिज (२०८२)