नेपाली हास्यव्यङ्ग्य अनलाइन पत्रिका

डा. बमबहादुर थापा जिताली :

लुटेर खान्छन् लुकेर खान्छन्‌
कुटेर लान्छन् भुटेर लान्छन् ।
ठसक्क ठस्केर बसेर हुन्न
मुसुक्क मस्केर डसे सहन्न ॥

छ चर्तिकला ढँटुवाहरूको
सातो लिए बटुवाहरूको ।
लुटुवा, ढँटुवा लुटेर खालि
भएन शान्ति चितुवा नफाली ॥

जाँदैछन् पर बिकुवा विदेश
खाँदैछन् घिचुवा झन् विशेष ।
कोही छन् भतुवा छ को हुँडार ?
खाएर खाली छ यो भँडार ॥

संघी र सालो गरेर पालो
खाए रमाए चढे उकालो ।
कवि ओरालो कति हिँड्नुपर्छ ?
बाटो रोकेमा अब गिँड्नुपर्छ ॥

काँन्लामा ठुटे हलो बिसाई
आएर बने अहिले कसाई ।
छ धुन्दुकारी जङ्गल–मासा
हुँदैन हेर्न कविले तमासा ॥

०००
रानीवन, काठमाडाैं