नेपाली हास्यव्यङ्ग्य अनलाइन पत्रिका

मन्त्री छन् धनधान्यपूर्ण रसिला, चिल्ला सुकीला अहा !
त्यस्तै छन् सब कर्मचारी हँसिला, साला–सहेली सफा
ब्यापारी हुन गो अपार धनको, स्वामी महा–तस्कर
सेठै जो बलबाहु चाकर यहाँ, छन् भक्षकै भक्षक ।।१।।

झन् झन् दीनदयालु बन्छ जनता, रोज्गार धन्दा नभै
अफ्रीका र मलेसिया अरबमा, जान्छन् तरूना सबै
नेता तक्षक झै बनेर ढुकुटी, रित्याउनै दक्ष छ
गुण्डाराज चलाउँछन् मुलुकमा, छन् भक्षकै भक्षक ।।२।।

नाता–गोत्र र क्षेत्र– चाप्लुस भए, पाईन्छ ठाउँ मजा
मेधा सीप र योग्यता पछि परे, उल्टो चल्यो सभ्यता
नेता तक्षक नाग झै बनिसक्यो, के भन्नु खै रक्षक ?
मात्रै यी भुँडीभक्त लस्कर सबै, छन् भक्षकै भक्षक ।।३।।

धादिङवेंसी