नेपाली हास्यव्यङ्ग्य अनलाइन पत्रिका

कोदालाको बिँडमा भाँचिएको जिन्दगी 

चप्पलको लोतीमा छिनेको जिन्दगी
हलोको फालीमा खिइएको जिन्दगी
सर्टको ढाडमा फाटेको जिन्दगी
खपी नसक्नु दुख्छ र दुखिरहन्छ
शरीरभरि सर्बत्र टालेको जिन्दगी !

निरन्तर खिएर आफ्नै तालुमा
फुटेर आफ्नै कुर्कुच्चामा
कुप्रिएर आफ्नै ढाडमा
चाउरिएर आफ्नै अनुहारमा
घरी घरी ऊ
अपरिचित जस्तो भएर
मेरो सामु उभिन्छ !

एकदिन हेरें गहिरिएर
उसको हत्केलामा ठेलै ठेलाहरूले
पढ्नै नमिल्ने गरी
धेरै पहिले नै पुरिएको रहेछ
उसको भाग्य रेखा !

धेरैबेर सोचिरहें…
यो देशमा
पसिना र आँसुको स्वादमा के फरक छ ?

हाल : अमेरिका