नेपाली हास्यव्यङ्ग्य अनलाइन पत्रिका

माकुनेबाट उछिट्टे पछि अलिकति लगानी योगेसमा पनि गरेको थें । यो दुई साता अघि योगेसको सेयर झिकेर प्रेम आलेमा इन्भेस्ट गरेको भए दोब्बर हुने रहेछ ! अब त के काम र बढ्ने जति ह्वात्तै बढी गो । फेरि यो धेर दिन टिक्ने खालको सेयर हुँदै होइन । पोहोर परार केपी ओलीको सेयर नबेची राख्ने हुँदा ख्वात्तै घटेर सगरमाथाबाट भ्यूटावरमा सीमित भो ! अस्ति शेखर र शेरबहादुरमा चाहीं खासै फरक नदेखेर शेर बहादुरमै छोड्दि राखेको थें ह्वात्त बढ्यो दुई चार दिन । तर यो लोदर ठाऊँमा इन्भेस्ट गरेछु । हत्पत बढ्दै बढ्दैन ।

त्यत्ति नै खेर त्यो बेचेर राजेन्द्र लिंगदेनमा इन्भेस्ट गरेको भए सत् प्रतिसतले बढ्ने रहेछ । तर यो पनि यसैमा रहिरहे घाटा हुने सेयर हो । यो कम्पनीको नयाँ ड्रीम प्रोजेक्ट भनेको पहिले नै असफल भइसकेको पुरानो राजा ल्याउने हो । कामै छैन ।

हेर्नुहोस् लगानी गर्ने गतिलो ठाऊँ नै छैन भन्या । झलनाथ र माकुने भनेका टाट पल्टेका कम्पनी परे । प्रचन्ड कम्पनीले इनसाइड सेल पटक पटक गरेकाले जनता तर्सिसकेका छन् । यो कम्पनीसँग आफ्नो सपना थ्यो भने आफै आफ्नो साख किन बार बार बेचिरहन्थ्यो ? अनेक प्रोपोगान्डा गरेर सेयरको भाऊ बढाउने अनि आफै अबसर लुट्ने यसको प्रवृत्तिबाट सबै लगानीकर्ता पीडित छन् ।

रविन्द्र मिश्रको शेयर भ्याल्यु आइपिओ खुलेको भन्दा पचास प्रतिसत माइनसमा छ । यो पनि जोखिम नै देखिन्छ । यसमा लगानी गरेर पनि पार लाग्छ जस्तो देखिंदैन । बाबुराम कम्पनी जनतालाई धोका दिएर टाट पल्टेको अर्को कम्पनी हो जस्लाई कम्पनी नभने पनि हुन्छ ।

गाह्रो छ । कहाँ लगानी गर्ने ? गतिलो ठाऊँ नै छैन ।

भर्जिनिया