नेपाली हास्यव्यङ्ग्य अनलाइन पत्रिका

ऊसले हार्यो भने देशले हार्छ
ऊ गुम्यो भने देश गुम्छ
ऊ संकटमा परे
देश संकटमा पर्छ
हैन यो चाटुकारले गर्न चाहीं के गर्छ ?
ऊ सिध्दियो भने
देशै सिद्धिन्छ
हामी सबै सिद्धिन्छौं
सकिन्छौं
भन्छ- अब संकट आइपर्छ
हैन यो पुतलीले गर्न चाहिं के गर्छ ?

उसले फट्याँई गरे जनताले गरेको
उसको आवाज- जनताको आवाज
अरूले बिरोध गरे भ्रम छरेको
राम्रो काम गर्नेको रीस गरेको
उसले जिते जनताले जिताएको
अरूले जिते संकटकाल आएको !
ऊ सत्तामा पुगे परिवर्तन आयो
ऊ सत्तामा नपुगे देशले दुख पायो
हाय ! हाय !
कतिलाई त
अझै ऊही मन पर्छ
हैन यो हाँकेले देशको लागि के गर्छ ?

ऊ बाहेक छैन कोही
ऊ बाहेक सबै देशद्रोही
लाज छैन घिन छैन
उसले पछुतो मानेको दिन छैन
जे बोले पनि भो
जे गरे पनि भो
जनताका आँखामा जति
धुलो छरे पनि भो !
सत्तामैं पुर्‍याए पनि
आफै सडकमा झर्छ
अब भन्नुहोस् त
यस्ता पाजीले
देशको लागि के गर्छ ?

कति ज्याद्रो हो
कति थेत्तरो हो
चरित्र छ महा चोट्टाको
भिरिरहेछ ट्याग महायोद्धाको !
आफूलाई के ठान्छ ?
अरूलाई के ठान्छ ?
हैन यसले खान चाहिं के खान्छ ?
लुट्नु लुटिसक्यो त अब के चाहन्छ ?
भन्छ –
‘हामी हार्नु राम्रो हैन
देशको भविष्य सुन्दर छैन’
साँचों त बोल्नै छोड्यो
बोली पिच्छे झुट हुन्छ
झुटको कुरो झुट बाहेक
अब कसले किन सुन्छ ?
झुटले हार्दा देश कसरी
के कारणले अस्थिर हुन्छ ?
अरूको भरै गर्दैन
यसको चाहिं के भर छ ?
जिते नै पनि यो छेपारेले
गर्न चाहिं के गर्छ ?

केही कुराको ठेगान छैन
यसको के भर छ ?
नढाँटी भन्नुहोस् त-
यसलाई देशको डर छ कि
देशलाई यसको डर छ ?
जिते नै पनि यो हुट्टिट्याऊँले
देशको लागि के गर्छ ?

०००

भर्जिनिया