नेपाली हास्यव्यङ्ग्य अनलाइन पत्रिका

अमर अधिकारी ‘कीर्तिमानी’ :

(बिहान अचानक भुइँचालो आएपछि)
श्रीमतीः ए बुढा छिटो छिटो निस्कौँ, बाहिर नत्र त ज्यान जान्छ।
श्रीमानः पख न ह्याँ कम्प्युटरमा टाइप गरेको तीन पेजको फाइल सेभ गरेर निस्कन्छु तिमी निस्कदै गर।
श्रीमतीः हरे ज्यान जाएगा नही छोडेगा भनेको यही हो। फाइल सेभ गर्ने कि ज्यान सेभ गर्ने?
१

(कक्षामा पढाइ भैरहँदा)
शिक्षकः भन त राजु, तिमीलाई भटमास मन पर्छ कि कालो मास ?
राजुः दुईटै मन पर्दैन मलाई त, मलमास मन पर्छ सर। मलमास महिनामा दुईटा संक्रान्ति हुने भएकोले टीका लगाएर दक्षिणा पाइने भएर।
२

(टोलमा एक साथी भेट्न आएपछि)
आगन्तुकः यो टोलमा तराजुको घर कुन होला ?
पसलेः को होला र यो टोलमा तराजु नाम गरेको मान्छे ? फेरि पसलपसलमा डिजिटल वेटिङ मेशिन आइसक्यो।
आगन्तुकः उहाँको पूरा नाम तर्क राज जुम्ली हो, अन्त पनि जानुपर्ने भएर हतारमा छोटकरीमा तराजु भनेको।
३

(एक अधिकृत मिलमा जाँदैगर्दा)
खरिदारः हाकिम भएर थैलो बोक्दै कुटानीका लागि मिलमा जान सुहाउँछ हाकिमसाप ?
अधिकृतः हाकिम मिलमा गएर पिस्न नपाइने कुन कानुनको कुन दफामा लेखिएको छ देखाउनुस् त ! तपाईँ जस्ता मान्छेले नचाहिँदो सोँच राख्नाले देश पछाडि परेको हो, बुझ्नुभो ?
४

(आन्दोलनकारीहरु माइतिघर मण्डलामा)
पत्रकारः केको आन्दोलन हो फेरी आज ?
आन्दोलनकारीः ‘फल’ लाई फलफूल भन्ने काम बन्द गरियोस् ‘फल’ र ‘फूल’ नितान्त फरक वस्तु हुन्। आजको हाम्रो आन्दोलन यसमै केन्द्रित छ।
५

०००
खुंग्री, रोल्पा। हालः बुढानिलकण्ठ, काठमाडौँ।