नेपाली हास्यव्यङ्ग्य अनलाइन पत्रिका

एउटा सार्वजनिक समारोहमा सरकारी स्कुलका शिक्षकले भाषण ठोकिरहेका थिए । उनी भन्दै थिए–
‘निशुल्क पढाइ हुने, स्तरीय स्कुल सरकारी स्कूल हो । तपाईंहरूको बालबच्चा सरकारीमै पढाउनु पर्छ । किन महँगो फि तिरेर निजीमा लैजाने ? म ग्यारेन्टी गर्दिन्छु, निजी स्कुलमा भन्दा सरकारीमै राम्रो पढाइ हुन्छ ।’

त्यो सुनेर मानिसहरूले गड्गडाएर ताली बजाए । उनको भाषण सकिनासाथ एक छेउमा बसेका निजी स्कुलका प्रिन्सिपलले उनलाई तानेर अर्को कुनोमा लगे । अनि खुसुक्क कानमा भने–

‘हैन हो सर, किन यस्तो चर्को बोलेको ? यसपालीदेखि तपाईंको आफ्नो बच्चा नि हाम्रो स्कुलबाट झिक्ने विचार छ कि के हो ?’

कुरा सकिन नपाउँदै हतारिएर सरकारी शिक्षकले भने–
‘किन झिक्थेँ र ? आफ्नो बच्चालाई सरकारीमा हालेर म किन उसलाई पछि मैजस्तो बनाउन चाहन्थेँ र ? यो त नुनको सोझो पो गरेको त !’

सिमलटार, काठमाडौं