नेपाली हास्यव्यङ्ग्य अनलाइन पत्रिका

रामकुमार पण्डित :

गिरीबन्धुको बारीमा सर्पले बाख्रा डसेछ
ठूलठूला अपराधमा निर्दोष चै फसेछ
कालापानीमा कालेले खतरा माछा पालेछ
नेताले घुँडा टेकेर देशकै प्रतिष्ठा फालेछ

जापान लान्छन् मन्त्री आफै गरीवलाई लेर
एयरपोर्टबाटै फर्काइदियो लाखौलाख खेर
मानव तस्कर भनी त्यै गरीवलाई जाक्छ
मन्त्री निर्दोष बनाइदिँदा विश्वास सबै भाग्छ

अमेरिका पठाइदिन्छन् सरणार्थी बनाई
भ्रष्ट आफैँ सरकारमा बस्छन् ठस्ठसी गनाई
विरोधीलाई तह लाउन सानो निहुँले पुग्ने
आफ्नो मान्छे दोषी हुँदा पक्राउ गर्न चुक्ने

नोट दिई भोट किनी यता बन्छ मान्छे नेता
परिवर्तन खोज्ने जिल्ल पर्छ विदेश हिँड्छ केटा
दु:खीलाई लात हानी भ्यू टावरमा बजेट हाल्छन्
ललिता निवास बेच्ने नेता ईज्जत सबै फाल्छन्।

०००
का म पा ६, सिमलटार।