नेपाली हास्यव्यङ्ग्य अनलाइन पत्रिका

खास्सै के भाछ र मलाई ?
अली अली न बिरामी भाको छु
त्यै पनि भर्खर
अमेरिकाबाट औषधीमुलो गरी आको छु
देश चलेकैथ्यो
आज पनि चलेकै छ
फेरि देश मन्त्री प्रधानमन्त्री
कहाँ चलाउँछन्
देश त पशुपतिनाथले पो चलाउँछन्
हैन देश चलेन भनेर
मान्छे किन यसरी बौलाउँछन् ?

फेरि जन्मदा पनि
सुस्त सुस्त जन्मेको मान्छे
ज्यान पनि कहिलै
तन्दुरुस्त नभाको मान्छे
प्रधानमन्त्री पनि
कति ढिलो खाको मान्छे
पार्टी सभापति त
कति पछि पाको मान्छे
अली अली बिमार भएर के भो त
देश न प्रचन्डले चलाए
न बाबुरामले चलाए
न अरु कोइ नाथेले चलाउँछन्
देश त पशुपतिनाथैले चलाउँछन्
हैन ए गाठे !
म प्रधानमन्त्री भाको देखी
यी पत्रकार भन्नेहरू किन बौलाउँछन् ?

ढिला भए पनि सुस्ती भए पनि
देश त चलेकै छ
जनताको घरमा
आगो बलेकै छ
किसानको खेतमा धान फलेकै छ
सुस्त सुस्त भए पनि
भित्र भित्र कत्रो काम गरिराको छु
संविधान बनाउनु पर्छ भनी
सबको कान भरी’राको छु
देश न माधव चलाए
न अरु ऐरे गैरेले चलाउँछन्
जनतालाई थाहै छ नि
देश त कसले चलाउँछन्
हैन ए ढकलपुरे
म प्रधानमन्त्री भाको देखी
अरु पार्टी प्रर्मुख किन बौलाउँछन् ?

भर्खर प्रभुको सवारी चलाको छु
मित्रराष्ट्रसँग
मिठो सम्बन्ध फलाको छु
देश विकास गर्ने भनी
मेरै पालामा
कत्रो पहाड ढलाको छु
सचिव खाली भएर के भो त ?
मन्त्री त खाली छैन
अधिकारी खाली भएर के भो त ?
पूजारी खाली छैन
देश न नेताले चलाउँछन्
न कर्मचारीले चलाउँछन्
कुरो क्लिएरकट छ नि
देश त पशुपतिनाथले चलाउँछन्
हैन ए गाँठे मेरो डाह गरी
मेरै पार्टीका नेता पनि किन बौलाउँछन् ?

दाङ, हाल– काठमाडौं