नेपाली हास्यव्यङ्ग्य अनलाइन पत्रिका

पिताः
हे छोरा ! मध्यपान हुन्छ जहरिलो कदापी पिउने नगर
मानव जीवन ध्वस्त पारी यसले तुल्याई दिन्छ बगर ।

पुत्रः
हुन्छ बा ! पहिलो र अन्तिम गिलास यही लाद्रोमा पार्दछु
मध्य भागका गिलासहरू सव साथीभाइलाई सार्दछु ।

पिताः
राजा नलको चालले तिमीले नखेल है तासजुवा
भानुभक्तको घाँसीले भनेझैं खन्दिनु एउटा कुवा ।

पुत्रः
ढाँटौँ किन हजूरलाई मैले सच्चा कुरा कहन्छु
तासजुवा कदापि छुन्न हे ! बुबा च्याँखे थापी सहन्छु ।

पिताः
परस्त्री गमनबाट हे ! छोरा सधैँ रहेस् है पर
एड्सको जगजगी छ है छोरा लाग्छ मलाई पो डर ।

पुत्रः
सत्यसत्य धरोधर्म हे ! बुबा पारी गाउँ गा’ छैन
आफ्नै गाउँका चेलीबेटीहरूको उद्धार गर्न भ्याछैन ।

पिताः
हे ! छोरा विदेशी लत्ता कपडा कहिले जिउमा नबेर
सक्छस् भने अंग्रेजी सिनेमा तैँले कदापि नहेर ।

हेटौडा, मकवानपुर