नेपाली हास्यव्यङ्ग्य अनलाइन पत्रिका

फेरि एकपल्ट सहिरहेछु
घृणाका तीखा वाणहरूलाई
जो, प्रतिक्षण मेरो छातीमा रोपिँदै छन्
सायद गाण्डीव धनुबाट वृष्टि भएका
वाणहरूभन्दा
ती सयौं गुना तीखा छन्
ती हजारौं गुना तीखा छन्
दिग्दिगान्तबाट ओइरिएका वाणहरूद्वारा
म पीडित छु
र, आफन्तहरूका आक्रमणद्वारा
म लज्जित छु
आह ! यी शिखण्डी हो !
प्रहार गर म भीष्मलाई
मेरो नमस्कार छ
मेरो साधुवाद छ
मेरो अवस्था–बलिदानको अवस्था
मलाई नरम ओछ्यान हैन शरशैय्या देऊ
र, सक्छौ भने पाताल गङ्गाको पानी देऊ
म त बलिदान हुँ
म त बलिदान हुँ
तिमीलाई जित उपहार दिएको छु
धेरै वर्षपछि फेरि एकपल्ट
दिल खोलेर हाँसेको छु !