नेपाली हास्यव्यङ्ग्य अनलाइन पत्रिका

जितेपछि गाउँ फिर्न जानिन्न
जनतालाई जनता मानिन्न ।
देश बनाउने ध्यान छैन हाम्रो
जनता मर्दा मान्दैनौ नराम्रो ।

आफ्नो भुँडी छाडिन्न भर्न
चासो छैन निर्धाको काम नगर्न ।
आफ्ना लागि दरवार बनायौँ
अहिले हामी सिनो झैं गनायौँ ।

सत्ता भत्ता गाडी र दरवार
नेता भए सप्रिन्छ घरवार ।
भाषण गर्न जान्दछौँ चर्को
हाम्रो भाषण सुन्नेलाई भो झर्को ।

कुर्सी चढ्ने खेल हाम्रो कस्तो छ ?
केटाकेटी पिङ् खेले जस्तो छ ।
यौटा ढाल्छौँ अर्कालाई चढाउँछौँ
चाँडो चाँडो त्यसैलाई लडाउँछौँ ।

कहिले गर्छौं कुर्सीले हानाहान्
कहिले गर्छौं त्यै कुर्सी तानातान
हाम्रै हुन्छ सडकमा आन्दोलन
सधै लाग्छ कुसी चढ्ने मन ।

खरिद बिक्री आ–आफै गरिन्छ
भुँडी भर्दा मिलेर भरिन्छ ।
राजनीति फोहरी खेल हुन्छ
कुकुर र बिरालो मेल हुन्छ ।
काठमाडौँ ।