नेपाली हास्यव्यङ्ग्य अनलाइन पत्रिका

केहि नेताहरू फेरि आन्दोलन गर्ने भन्न थाले
जनसङ्ख्या घटाउने र गरिबी बढाउने उपाय रोज्न थाले
तिनको विरोधमा अब हामी पनि आन्दोलन गरौँ
जनसङ्ख्या घटाउने र गरिबी बढाउने काम हामी पनि त गर्न थालौँ !

हेर्नुहोस् त, आन्दोलन गरि गरि उनीहरू नेता भए
धनी भए, ठूला भए, अत्याचार गरे, मोटाघाटा भए
हामी सहिद भयौँ, बाँकी गरिब भयौँ, दुखी र रोगी भयौँ
उनीहरूले त्यो गरे र त्यो भए, हामीहरूले त्यो नगरेर यो भयौँ !

त्यसैले, ल आउनुहोस् अब हामी पनि आन्दोलन गरौँ
उनीहरूले जे गरे त्यहि गरौँ, उनीहरू जे बने हामी बनौं
आखिर समाजका आदर्श तिनै हुन्, शीर्षस्थ तिनै छन्
अब हाम्रो पालो, आउनुहोस् आन्दोलन गरौँ !

गरिबीका कुरा गरि गरि उनीहरू धनी भए
अत्याचार विरुद्ध बोल्दा बोल्दै अत्याचारी भए
ल आउनुहोस् गरिबी घटाउँ, अत्याचार मेटाउँ
आजैदेखि सुरु गरौँ यो आन्दोलन,
ल भन्नुहोस् अब आज कसलाई ठटाउँ ?
आउनुहोस् आउनुहोस्, नयाँ आन्दोलन चर्काउँ !!

बत्तिसपुतली, काठमाडौं