नेपाली हास्यव्यङ्ग्य अनलाइन पत्रिका

हामी नेपाली जनताले सरकारलाई सधैँ सहयोग र संरक्षण गर्दै आएका छौँ । सरकारले हामी जनतासँग बेलाबेला केही सानातिना अपेक्षा गर्छ । हाम्रो गच्छेले भ्याएसम्म उसका माग पूरा पनि गरिदिएकै छौँ । किनभने, हामीलाई हाम्रो सरकारका दुःखहरू थाहा छ । उसको निरीहपन थाहा छ । उसका लाचारी र बाध्यताहरू थाहा छ । त्यसैले हामी उसलाई सघाउन सधैँ तत्पर हुन्छौँ । हामी नेपाली जनता हाम्रो सरकारप्रति अत्यन्त दयावान् छौँ । उसको मायाले ओतप्रोत छौँ ।

गएको दीपावलीमा सरकारले हामीलाई दीप नजलाई दीपावली मनाउन आग्रह गर्‍यो । सरकारले भन्यो, \’म निरीह छु । दुःखी छु । जनतालाई दिन मसँग पर्याप्त बिजुली छैन । भएका विद्युत् आयोजनाहरू मर्मत गर्न नसकेर बेहाल छ । नयाँ आयोजना समयमा पूरा हुँदैनन् । विभिन्न बाधाव्यवधान आइरहन्छन् । गाउँलेहरूले सेयर माग्छन् । डनहरूले बाटो छेक्छन् । ठेकेदारहरूले निहुँ खोज्छन् । म केही गर्न सक्दिनँ । अतः तपाईं नेपाली जनताले बत्ती नबालिदिनूस् ।\’ सरकारले रुन्चे स्वरमा भनेपछि हामी त पग्लिहाल्यौँ । सरकार सँगसँगै गहभरि आँसु पारेर हामीले अँध्यारोमै छामछाम छुमछुम गर्दै बिस्तारै दीपावली मनायौँ ।

सरकारले भन्यो, उसको प्रहरी प्रशासन एकदमै नाजुक छ । पुलिसहरू कमजोर र डरछेरुवा छन् । गुन्डा केटाहरूले उनीहरूलाई आक्रमण गर्छन्, घाइते बनाइदिन्छन् । पटका सल्काएर उनीहरूका पिँधतिर हुर्‍र्याइदिन्छन् । सुरक्षा व्यवस्था मिलाउनै सकिन्न । दिउँसै त उनीहरूले आक्रमण गर्छन्, रातीको त झन् कुरै भएन । त्यसैले राती देउसी नखेलिदिनूस् । सरकारले रोइकराइ गरेपछि हामीलाई सरकारको अति नै माया लाग्यो । हामीले राती देउसी खेलेनौँ ।

अबका दिनमा पनि हामी चाडपर्वहरू मनाउँदा सरकारलाई सघाउन तयार छौँ । अर्को वर्षदेखि हामी दसैँमा तीन दानाभन्दा बढी अछेता निधारमा टाँस्ने छैनौँ । शान्ति सुरक्षामा खलल पुर्‍याउने प्रकारका जात्रा, चाडपर्व, नाचगान, झाँकी, उत्सव, भोजभतेर गर्ने छैनौँ । बाजागाजा बजाउने छैनौँ । चंगा उडाउने छैनौँ । साँझ परेपछि हामी पसल, होटल वा रेस्टुराँहरू बन्द गरेर सरकारलाई शान्तपूर्वक निदाउन सहयोग गर्नेछौँ ।

चाडपर्वका बेला हामीले यातायातको क्षेत्रमा पनि सरकारलाई सघाउनुपर्नेछ । बिचरा सरकारले बाटो राम्रो बनाउन सकेको छैन । यातायातका साधनहरू व्यवस्थित गर्न सकेको छैन । नियम कानुनहरू कार्यान्वयन गर्न त्यस्तै मुस्किल छ । यातायात व्यवसायीले गाडीमा चार गुनाभन्दा बढी यात्रु चढाउने, कवाडीलाई दिनुपर्ने गाडी भीरका कच्ची सडकमा तीव्र गतिमा दौडाउनेजस्ता समस्या हाम्रा सधैँका समस्या हुन् । सरकार त्यस्ता कुरा रोक्न असमर्थ छ । सरकारले भनेको पुलिसले त मान्दैन, अरूको के कुरा ! त्यसैले दुर्घटनाबाट बच्न हामी त्यस्ता गाडी नचढौँ, बरू ढाकर बोकेर पैदलै हिँडौँ । सरकारलाई सडक सुरक्षा गर्न नसकेको आरोप लाग्नबाट बचाऔँ । राजधानीका सडकमा हिँड्दा झनै सावधान होऔँ । ध्वस्त सडकका खाडलहरूमा बचेर हिँडौँ । सवारी साधनमा हिँड्दा पनि हातले डन्डीमा च्याप्प समातौँ । आफ्ना करङ जोगाऔँ । सरकारलाई गाली नगरौँ । माया गरौँ । दया गरौँ । गरिब र दुःखी सरकारको सेवा गरेर पुण्य प्राप्त गरौँ । यो लोक यस्तै भइगो, परलोक सुधारौँ ।

\’नेपाल\’ साप्ताहिक २०७१ कार्तिक