नेपाली हास्यव्यङ्ग्य अनलाइन पत्रिका

हेर्यौं बर्सौ तिन दशक नै, देशको लोकतन्त्र
भोगी ढोगी निरस– अगुवा, चाहने एकतन्त्र ।
मात्रै सत्ता सयर यिनको, जल्पना कल्पना भो
मात्रै नाता– अनुचर उठे, देश बर्बादमा गो ।।१।।

बाझ्ने जुध्ने जन– भ्रम छरी, देशलाई निमोठ्ने
जोगीजस्ता विकल जनतालाई, औधी चिमोट्ने ।
नारा छर्दै, धनपति बने, नक्कली शीर्ष नेता
हामी भन्छौं ‘नव नियम’ ली, ओर्ल हे लौह नेता ।।२।।

भाते छाते, नव–धनपति, गर्न सक्दैन राज
भोगी रोगी, दलपति हुँदा, मर्छ झन् राजकाज ।
देशै हाम्रो, विघटन हुने, देख्न थाल्यौँ तमासा
हामी भन्छौ, ‘नव–नियम’ ली, ओर्ल है लौह नेता ।।३।।

मिल्दैजुल्दै, युगयुग बस्यौँ, मान सम्मान गर्दै
नेपाली हौँ, अविचलित छौँ , एकतामा सुसेल्दै ।
फुट्ने टुट्ने, मन मगजका, प्लास्टिके तुच्छ नेता
फाल्छौँ हामी जनजन मिली, ओर्ल हे लौह नेता ।।४।।

(गणेशमान शतवार्षिकी सन्दर्भमा)
०७१ कार्तिक २२