नेपाली हास्यव्यङ्ग्य अनलाइन पत्रिका

भैँसेपाटीमा मानिस बस्छन्
हाँडीगाउँमा गहना खोज्छन्
काँडाघारी काँडा नकोरने !
भत्केको पुल तर्दा नमर्ने !

पानी टङ्कीमा पानी अनिकाल
सुकेधारामा झन् के हाल ?
आकासे धारामा इनार खन्छन्
कालधारामा कालै नुहाउँछन् ?

खुर्सानीटारमा तरकारी पिरो
ढुङ्गा अड्डामा मार्बल हिरो
अनामनगरमा नामै नाम
शान्तिनगर छ झगडा धाम ।

सुबिधानगरमा सुबिधा छैन
बनियाटारमा व्यापार हुँदैन
भोटेबहालमा भोटे भेटिन्न
रातोपुल किन रातो हुँदैन ?

थापा गाउँमा सब थरि बस्छन्
कपनमा खोई के के कप्छन् ?
सरस्वती खेलमा निरक्षरी छन्
अत्तरखेल ता दुर्गन्धित् झन् ।

धापासीमा धाप भासिन्छ ?
सुनधारामा सुन पाइन्छ ?
माली गाउँमा फूलै छैन
हल्चोकमा पनि हलगोरु छैन ।

ढल्कोका सबै सोझै हिँड्छन्
डिल्ली बजारमा नेपाली बोल्छन्
बाफलका खोइ के फल खान्छन् ?
हेपालीलाई हेप्ने हेपिन्छन् ।

गोठाटारमा गोठ न गुइँठा
कुमारीगालमा केटै केटा
चुनदेवीमा चुन छ महँगो
जोरपाटी जोर भव्य महलको ।

सुन्दरीजलमा अनुहार कस्तो !
धोबीखोलामा धोबी नबस्दो
डल्लुमा गई डल्ली खोज्नु ?
नक्सालमा के नक्सा कोर्नु ?

आलापोट्मा पासा न थरकी
धर्मस्थलीमा पापी हुन्न कि ?
भंगालमा पनि ढुक्कै निदाउँछन्
सितापाईला मानिस हिँड्छन् ।

सामाखुसीमा को पो खुसी छ ?
बिजुलीबजारमा बिजुली कति छ ?
पेरिस डाँडा फ्रेन्च नबोल्नू
हात्तीसारमा हात्ती नखोज्नू !

नाम र काम सब बे ढङ्गी
काठमाण्डू छ रङ्गी र चङ्गी
काठमाण्डूमा पस्दै नपस्नू
पसिहाले पनि बस्दै नबस्नू ।

बत्तिसपुतली, काठमाडौं