नेपाली हास्यव्यङ्ग्य अनलाइन पत्रिका

जित्ने हार्ने क्रमहरू दुबै, हुन्छ मिल्ने कुरामा
सम्झौता हो अलिकति लिने, वा दिने हो कुरामा ।
आफ्नै मात्रै अभिमत यहाँ, राज गर्दैन धेर
बुझ्द्यौ हाम्रा दलपतिहरू, मेलमा भो अबेर ।।१।।

ठूला आन्दोलन कति भए, मारिए युध्द वीर
घाइते छन् कतिकति यहाँ, क्वै छ गम्भीर धीर ?।
लाग्ला यिन्का विमल– मुटुका, श्राप हे शीर्ष नेता
सम्झौतामा पुग अब सबै, नत्र होला अबेला ।।२।।

धेरै खेल्यौ अब त अति भो, गुम्न सक्ने छ मौका
हान्लान् धेरै अतिहरू मिली, जिल्ल पारेर चौका ।
अन्त्यैको यो समय बुझिद्यौ, झट्ट देउ विधान
ठट्टा सम्झी गुट्फुट गरे, बन्छ धेरै चिहान ।।३।।
रातै पर्ला मुलुकभरमा, झुल्कदैनन् बिहान ।।
धादिङबेँसी