नेपाली हास्यव्यङ्ग्य अनलाइन पत्रिका

झगडा तगडा बन्दै, शीर्षकै टाउको पुग्यो
चुच्चे ढुङ्गो उही टुङ्गो, घुम्दै घुम्दै झुकी नुह्यो ।
कार्यदल बनाएर, लछार्यौ द्वन्द्वका कुरा !
बालुवा गिट्टी पेलेर, तेल झर्दैन है भुरा ।।१।।

सात साल चले वार्ता, बजेट सिद्धिए कति ?
नाता चाकरका गोजी, भरिए चुलिए अति ।
प्रभुभक्त बनी सध्धैं, देशभक्ति मरीसक्यो
भुलायौ जनता धेरै, श्रद्धा हाम्रा मरीसक्यो ।।२।।

ल्याङ्फ्याङ गरी शीर्ष, सत्ता चल्दैन है बुझ
ज्वालाको मुख बाएर, जनता उठ्छ निश्चय ।
माघ आठ थियो तिम्रै, ‘वाचा’ आचा नखाईद्यौ
संविधान रची नौलो, चाचा नाना सजाइद्यौ ।।३।।

शीर्ष नेता त्यसै हुन्न, दूर–दृष्टि नभैकन
लुटुवा–फुटुवा बानी, छोड्न सक्छौ त दुर्जन ?
अँध्यारो व्योम देखिन्छ, उल्का–उत्पात बर्सला
हुरी बतास चम्केर, जन–आक्रोश गर्जला ।।४।।
धादिङबेँसी