नेपाली हास्यव्यङ्ग्य अनलाइन पत्रिका

(प्यारोडी)

महँगीले बगायो सललल
लोडसेडिङले नेपालै झललल ।

मट्टितेल नपाउँदा
छोरो भोकै बस्यो
चक्काजाममा सुत्केरिको
बाटोमै नाल खस्यो
नेपाल बन्द गरेर सललल
लोडसेडिङले नेपालै झललल ।

महँगीले थिची थिची
जनता मार्न आँट्यो
राहत दिन्छु भन्ने बजिया
फेरि जनता ढाँट्यो
अँध्यारोमा मैन बत्ती सललल
लोडसेडिङले नेपालै झललल ।

रक्षा गर्छु भन्ने पनि
भक्षक बन्न थाले
सभासद भन्ने पनि
डाकु बन्न थाले
आशान्तिले नेपाल खलबल
लोडसेडिङले नेपालै झललल ।

भ्रष्टाचारको दोलो सेक्ने
कस्को बाउको तागत
जसले जति खाए पनि
मिलाका छन् कागत
भ्रष्टाचारले बगायो सललल
लोडसेडिङले नेपालै झललल ।

एउटा जान्छ दक्षिणतिर
अर्को उत्तरतिर
काले काले पालै पालो
खाएका छन् खिर
नेताज्यू,
भट्टी भित्र हाँसेका गललल
देश बेची खान्छन् कि सललल ।
जनता,
भोको पेटमा हाँसिदेऊ गललल
लोडसेडिङले नेपालै झललल ।
दाङ, हाल काठमाडौं