नेपाली हास्यव्यङ्ग्य अनलाइन पत्रिका

जुन बल्छीको चारो खान्छ
माछा उसैको हुन्छ
धर्म गरेको भन्ने कि पाप
सधैंभरि स्नान गर्ने माछाले
मरेपछि पनि सुख पाउँदैन
तातो कराईमाथि उम्लिएको तेलमा
झ्याइँ–झ्याइँ पोलिनुपर्छ ।
पीडितले न्याय पाउला र यो देशमा ?
न्यायाधीशले नै घुस लिएपछि
कसको पक्षमा वकालत गर्छ ?
हरेक सरकारी कार्यालयमा
टेबलमुनिबाट लेनदेन हुन्छ
लिने र दिने दुवैलाई च्याप्प समातेर
नाङ्गो बनाएर
काउसोको माला लगाएर
रत्नपार्कमा लगेर छाड्नुपर्छ
बिर्सनु हुँदैन, त्यसलाई चारपाटा मुड्नुपर्छ ।
के गर्नु बखान
जोडेर उखान
भ्रष्टाचार मौलाएकै छ
नानी, पानी र जवानी पलायन भएकै छ ।
ऊ गर्छु भनेर गएको मान्छेले
ऊ गरेर ऊ गर्छ
ऊ गर्दागर्दै उसको ऊ भएछ
देश र जनताका लागि लड्दालड्दै
बिचराको बल, वैंश र जवानी गएछ ।
तपाईंले संविधान लेख्नुभयो भने
कति दिनमा तयार पार्नुहुन्छ ?
एक वर्ष ।
एक महिना ।
एक दिन ।
एक घण्टा ।
एक मिनेट ।
वा एक सेकेन्ड ।
लेख्ने दृढ इच्छा हुनुपर्छ
शक्ति आफैं उत्पन्न हुन्छ
एकै बसाइमा महाकाव्य त तयार हुन्छ ।
कसले भनेको ? नेपालको संविधान लेख्न
६०१ को बथान चाहिन्छ
पटक/पटक चुनाव हुनुपर्छ
जारी गर्ने मिति सारिरहनुपर्छ भनेर ।
यी सबै सुषुप्त सुनामी छाल हो
नेपाली जनतालाई उल्लु बनाउने चाल हो
एचआईभीबाट बच्ने भरपर्दो माध्यम
प्यान्थर अनि ढाल हो ।
हामी हाकाहाकी भन्न लाज मान्छौं
भित्रभित्रै त्यही काम गर्छौं
अनि त सावधानी अपनाउन बिर्सन्छौं
त्यही भएर
भीआईपीको संख्याभन्दा
एचआईभीको संख्या बढ्दै गा’छ ।
तपाईलाई थाहा छ ?
एउटै चर्पी प्रयोग गर्दैमा,
जुठो खाँदैमा,
अँगालो मार्दैमा
सर्दैन
नसरेसम्म बचाउने प्यान्थर
सरेपछि नो आन्सर ।
जोगीमारा, धादिङ