नेपाली हास्यव्यङ्ग्य अनलाइन पत्रिका

गाउँको लागि
ठाउँको लागि
अलिकति झुक्न छोरा भन्यो
मान्दै मान्दैन
ठुला बडालाई
गुरु वर्गलाई
यसो ढोग्न छोरा भन्यो
जान्दै जान्दैन
कस्तो लठ्ठक छोरा जन्माइएछ
हैन हो बुढी !
पानी परेको कि खडेरी लागेको
कुन साइतमा
खेतमा पानी खन्याइएछ ?

देशको लागि
जनताको लागि
सहमति गर्न छोरा भन्यो
टेर्दै टेर्दैन
छरछिमेक र
प्ररिस्थितिलाई हेर्न छोरा भन्यो
हेर्दै हेर्दैन
कस्तो छोरा जन्माइएछ
हैन हो बुढी !
घाम लागेको थियो कि पानी परेको थियो
कस्तो समयमा रमाइएछ ।

विकासका लागि
भ्रष्टाचार नगर छोरा भन्यो
सुन्दै सुन्दैन
निकासका लागि
मेलमिलाप गर्न छोरा भन्यो
मनमा कुरो
गुन्दै गुन्दैन
थुइक्क बजिया !
कस्तो एकलकाँटे छोरा बनाइएछ
हैन हो बुढी !
ट्वाट खाइएको कि भाङ
कुन बेलामा
भाँडोमा धमिलो पानी जमाइएछ ?

झगडालु पनि उस्तै
ढँटुवा पनि उस्तै
तोडफोडमा पनि उस्तै
लठुवा पनि उस्तै
कस्तो हरिलठ्ठक छोरा जन्माइएछ
हैन हो बुढी !
औँशी थियो कि पूर्णे !
कुन साइतमा तिमीलाई
मायाको पोको थमाइएछ ।
दाङ, हाल– काठमाडौं