नेपाली हास्यव्यङ्ग्य अनलाइन पत्रिका

१. कुनै नेपालबन्द, हड्ताल, आमसभा या जुलुसको हुलमुलमा कोही मर्यो र सहिद घोषणा गरियो भने उसले देखेका सबै सपना यहाँका सबै नेताले ठ्याक्कै थाहा पाउने गरेको कसरि होला ?

२. हाम्रा सप्पै सहिदका सप्पै सपना हाम्रा सप्पै नेताले कसरी थाहा पाउँछन् र कसरी कण्ठ पनि पार्छन् ?

३. उहिल्यै बितेका नेताले के कस्ता सपना कहिले देखेका थिए भनेर अहिले पटापट भन्न सक्ने अहिलेका यी नेता के भूतकालदर्शी झाँक्री हुन् ?

४. भोट जिउँदाको माग्ने अनि काम चैं सहिदका सपना साकार पार्ने भनेपछि यी अहिलेका नेता मृतात्माका मात्रै प्रतिनिधि हुन् कि ज्युँदाका प्रतिनिधि पनि हुन् ?

५. सहिद हुनुभन्दा अगाडि के उनीहरू खालि सुतिरहने, सपना देखिरहने र देखेका सपना जति अहिलेका नेतालाई भनिरहने गर्थे होलान्, होला यो कुरो ?

६. अहिलेका यति धेरै नेताले यत्रो वर्ष सरकार चलाउँदा पनि कुनै सहिदका कुनै सपना पूरा भएका छैनन् भने कति धेरै सपना देखेका रहेछन् त ती सहिद हुनेहरूले ?

७. त्यत्रा ठूला ठूला, त्यत्रो धेरै सपना देख्न हाम्रा सहिदहरूलाई सहिद नबनिसक्दाको अवस्थामा कति लामो समय निदाएरै बिताउनु पर्यो होला ?

८. कुनै ज्युँदै जनता आएर मेरो त सपना परेन, बिपनामा सोचेकै कुरा साकार गरि दिनोस् नेताजी भन्यो भने “हामी त सहिदका सपना मात्रै साकार पार्ने नेता हौँ, ज्युँदाका सोचाई साकार पार्ने नेता विदेशमा पाइन्छन, यहाँ होइन” भन्लान कि नभन्लान् अहिलेका नेताले ? कि त्यसलाई पनि सहिद बनाइदिएर अनि उसका सपना साकार पार्नतिर लाग्लान् ?

९. सहिदका सपना सकार पार्न जो नेता लाग्छ ऊदेखि सहिदका आत्मा प्रसन्न भएर आशिर्वाद दिने अनि नेताको चैं सपना बिपना सबै साकार हुने गरेको किन होला ?

१०. मृतकको नाममा ज्युँदालाई ढाँटेर आफ्नो पेट भर्ने पेसाकर्मीलाई नेता बाहेक अरु के भन्न सकिन्छ ?

११. तपाईं पनि आफ्ना सपना या बिपना या दुवै सकार पार्न चाहनु हुन्छ भने आफू सहिद बन्ने तारतम्य मिलाउनुहोस् अनि नेताले तपाईंका सपना साकार पारिदिनेछन् । अथवा नेपालको नेता बन्नुहोस् र अरु सहिदका सपना साकार पार्न लाग्नुहोस् ।

१२. अहिलेका नेताले उहिलेका सहिदको सपनाका भाषण सुनाउनुलाई तपाईं के भन्नु हुन्छ ?
(क) सहिदप्रति जनताको भावनामाथि बलात्कार, (ख) सहिदका नामको दुरुपयोग, (घ) सुद्ध फट्याईं
बत्तिसपुतली, काठमाडौं