नेपाली हास्यव्यङ्ग्य अनलाइन पत्रिका

माघ आठमा संविधान आउँछ, म ढुक्क छु
गएको माघ आठमा संविधान आएन, म ढुक्क छु
अब जेठ पन्ध्रमा संविधान आउँछ, म ढुक्क छु
न आए संबिधान आउँदैन, म आइ हाल्छु, म ढुक्क छु ।

कुरो संविधान आउँछ आउँदैन होइन, म ढुक्क छु
कुरो म ढुक्क छु कि छुइन हो, म ढुक्क छु
सप्पै मिले संविधान बन्छ, म ढुक्क छु
म नै कोहिसँग मिल्दिन, म ढुक्क छु ।

नेपालीलाई नया संविधान चाहिएको छ, म ढुक्क छु
नयाँ त के पुरानो पनि पाउँदैनन्, म ढुक्क छु
साँढेको फल म झार्दिन, म ढुक्क छु
स्यालहरू पछि लागि रहन्छन्, म ढुक्क छु ।

उत्तर पनि हेरेको छु, दक्षिण पनि हेरेको छु, म ढुक्क छु
कतैबाट आयो भने हामी समात्न सफल हुन्छौँ, म ढुक्क छु
हामी सफल हुनु पर्ने हो, सफल छौँ र रहन्छौँ, म ढुक्क छु
विफल भए जनता नै हुने हुन्, म होइन, म ढुक्क छु ।
काठमाडौं