नेपाली हास्यव्यङ्ग्य अनलाइन पत्रिका

यहाँ
खसीको मासु पाइन्छ भन्ने ठाउँमा
बुढी बाख्री काटिन्छ
भगवानको घरमा नयाँ जुत्तासँग
पुरानो जुत्ता साटिन्छ
हरेक दिन यहाँ
नयाँ–नयाँ कुराको हल्ला छ
तपाईंलाई के थाहा ?
मेरो शहर कति झल्ला छ ।

काम नगर्नेहरूबाट नै यहाँ
ठूलो ठूलो भाषण छाँटिन्छ
हुट्टीट्याउँले आकाश आँटेझैं
ठूला ठूला आश्वासन बाटिन्छ
भुसिया कुकुरबाट यहाँ
तपाईं हाम्रो दिमाग चाटिन्छ
आज एउटा कुराको सल्लाह छ
भोलि अर्कै कुरोको हल्ला छ
तपाईंलाई के थाहा
मेरो शहर कति झल्ला छ ।

यो शहरको भित्र एउटा
बाहिर अर्कै खोल छ
मान्छे पिच्छे यहाँ
मान्छे मान्छेको मोल छ
निमुखाहरू त बिचरा न हुन्
बलिया बाङ्गाको नै यहाँ बोल छ
बाहिर जति तडक भडक भए पनि
भित्र सबैको डामाडोल छ
आजको भाले त्यो
भोलि त अर्कै चल्ला छ
तपाईलाई के थाहा
मेरो शहर कति झल्ला छ ।

घरैपिच्छे यहाँ
तुम्बा ठर्राको भट्टी छ
भट्टीभित्र
मन बहलाउने अधबैसे पट्ठी छ
नगद नारायणलाई स्वागत
तर उधारो माग्नेलाई कट्टी छ
बाहिर छेक्ने पर्दा भए पनि
भित्र सबै खुलमखुल्ला छ
तपाईंलाई के थाहा
मेरो शहर कति झल्ला छ ।

ठग्नेहरू पनि यहीँ
ठगिनेहरू पनि यहीँ
जति शुद्धताको कुरा गरे पनि
खाद्यन्नमा माटोमा डल्ला छ
हिजो पनि
आज पनि
सरकारको सधैं यहाँ
कारवाही गर्छु भन्ने मात्रको हल्ला छ
एउटाले पिटे जस्तो
अर्कोले रोए जस्तो
भित्र–भित्र दुवैको दरो सल्लाह छ
तपाईंलाई के थाहा
मेरो शहर कति झल्ला छ ।
दाङ, हाल– काठमाडौ