नेपाली हास्यव्यङ्ग्य अनलाइन पत्रिका

काम परी जब गाउँ हिँड्या
बसका कन्डक्टरहरू
ज्यानै लिन्या गरी भिड्या
एउटा मलाई तान्न भिडी गयो
अर्कोे झोला बोकी हिँडि गयो
एउटा यो बस भनी तान्दछ
अर्को त्यो बस भनी तान्दछ
यात्रुलाई त बजियाहरू
बलीको बोको नै ठान्दछ ।

बिच सडकमा घण्टौँ
तानातानमा परियो
बल्ल बल्ल बसमा
ज्यान जोगाई चढियो
खाना खाने भनी बाटोमा
एकान्तमा लग्याको
होटेल्याले पनि ठग्नुसम्म ठग्याको
बासी खुवाइ कासी खुवाइ
लुट्नसम्म लुट्याको
यो हेरन्या निकायको
कस्तो आँखा फुट्याको ।

नखाउँ भने बेस्कन भोक लाग्याको
खाउँ भने पनि बासी छ पाक्याको
सडेको छ खाना डढेको छ खाना
मान्छेलाई भन्दा बस्तुको दाना
सरकारले आँखा चिम्ल्या पछि
यस्तो धन्दा झन बढाउँछन्
थाह छैन होटेल्याले
पैसो कहाँ कहाँ चढाउँछन् ।

कसैले देश लुट्याको
कसैले मुलुकै लुट्याको
बस र होटेल्याहरूले पनि
बाटोमा यात्रु लुट्याको
बिरोध गर्न खोज्दा त
झन्नै होटेल्याले चुट्याको
यो हेरन्या फाँटको
कस्तो आँखा फुट्याको ।
दाङ, हाल– काठमाडौं