नेपाली हास्यव्यङ्ग्य अनलाइन पत्रिका

कस्ता कस्ता सपना पालेर पढियो क ख ग
मेरा ती सप्पै सपना अहिले नेतासँग छ

कत्ति थिए आदर्श कत्ति थिए उद्देश्य
ती सप्पै अहिले बन्धकी नेतासँग छ

नसोध मसँग मेरो नाम र परिचय
पहिला मैसँग थिए अहिले नेतासँग छ

खुब गरिन्थ्यो बहस ‘तरबार ठुलो कि कलम’
दुइटै बराबर अहिले नेतासँग छ

सोच्थेँ एउटा चन्द्रमा त म पनि बनाउँछु
कहाँ बनाउनु ? सिङ्गै आकाश नेतासँग छ

धर्म इमान आत्मसम्मान विवेक जम्मै थिए आफ्नै
हुर्कदा हुर्कदै हराएछु, अहिले नेतासँग छ

खोज्दैछु म आजभोलि आफ्नै ठेगाना
भेटिन्न कतै, साथी भन्दै थियो– नेतासँग छ
काठमाडौं