नेपाली हास्यव्यङ्ग्य अनलाइन पत्रिका

अलग्गै चाहियो राज्य सानो टुक्रा भए पनि
खै हुनै मन लाग्दैन सिङ्गै नेपालको धनी
आश्वासन थियो जस्तो तमुवान् मगरातको
मलाई राज्य चाहिन्छ यो मेरै जातभातको ।

नेपाली हुनुमा के छ ? भो हुन्न हुन्न भो भयो
नेताका मृदु भाषाले यो बुद्धि बिग्रिदै गयो
जातीय राज्यको नारा प्रचण्ड बाबुरामले
जो दिए अब चाहिन्छ राज्य त्यै जात–नामले ।

म थारु थारुको राज्य मलाई मिल्नु पर्दछ
म नेवार नयाँ राज्य नेवा नै हुनुपर्दछ
म किराँती म पुर्बेली अरूसित मिलूँ किन ?
म मेरो राज्य चाहन्छु अरू क्यै बात जान्दिन ।

तराईको म मधेशी पहाडेसित मिल्दिन
मधेशी राज्य चाहिन्छ मलाई अरु जान्दिन
मार्सी धान फले पुग्छ लाली गुराँस चिन्दिन
मलाई चाहियो ब्यर्थ हिमाली झरना किन ?

आश्वासन थियो जस्तो प्रचण्ड बाबुरामको
मलाई राज्य चाहिन्छ यो मेरै जात नामको
हे प्रचण्ड महान् नेता हे बाबुराम मानव !
बाँड्छु भन्नुभएकै हो लिन्छु राज्य दिनुस् अब !
कोलोराडो, अमेरिका