नेपाली हास्यव्यङ्ग्य अनलाइन पत्रिका

दातालाई हतारो छ दिन चाहन्छ बेसरी
भन्छ मानवता मेरो उदार मनले भरि ।
चुनौती सामना गर्ने रहोस् हिम्मत भन्दछ
दाता दिन तयारै छ आफन्तसरि गन्दछ ।।

हाम्रो मुलुकको शैली शङ्कैशङ्का भएसरि
सुस्तताभित्र झन् सुस्त चाहना नभएसरि ।
कहिले कानुनी बाधा कहिले छैन तीव्रता
प्राविधिक कतै गाँठो फुक्तै छ रे यताउता ।।

अझ ट्याङ्कर नै नौला छैनन् रे वर्ग वर्गका
छैनन् चालक रे दक्ष सबै दुर्गम मार्गका ।
बिमा प्रमाणको कार्य थालनी स्वप्नझैँ छ रे
कमिसन दिने कस्तो नभने गाडी जान्न रे ।।

लिने पक्ष अझै के के बाहना मात्र खोज्दछ
जिम्मेवारी अरूमाथि थोपर्दै भाग्न खोज्दछ ।
सुनियो कहिले गाडी सम्झौता अनि कागज
बाटो दुर्गम रे त्यस्तै ग्यारेन्टी फाइदा अझ ।।

जय होस् ! जहिलै मौका स्वार्थमै मात्र जीवन
धूर्तता छलको खेल छैन मानवता मन ।
जनता दुःखमै जन्मे बाँच्छन् दुःख गरी गरी
निर्मोही व्यक्तिले गर्दा अझै दुःख मरी मरी ।।

काठमाडौं