नेपाली हास्यव्यङ्ग्य अनलाइन पत्रिका

दिल्ली दर्शनको इच्छा कसरी पूर्णता दिऊँ
रोकिएँ बन्दमा आफू भविष्य कसरी लिऊँ ।
प्रभु दर्शनको भक्ति शक्तिशाली अवश्य हो
के गरूँ बन्दले गर्दा दिल्ली दर्शन शून्य भो ।।

न्यास ध्यान गरे मात्र हुन्छ दर्शन ईश्वर
रहस्य यो बुझेँ बल्ल के गर्नु क्ष्यम्य होस् तर ।
बन्द भोग्ने हुँदै हैन गर्ने रे बल्ल ज्ञान भो
दिल्ली दर्शनका निम्ति बन्दमा लाग्नु सान भो ।।

समता ममता हैन पूर्णता नै सधैँभरि
दिन्छ आशिष रे दिल्ली जान पाऊँ कसै गरी ।
धोको यो पूर्णता होला नहोला भन्न सक्दिनँ
गए रे मित्र ती बन्धु नजाऊ रोक्न सक्दिनँ ।।

लेऊ आशिष हे मित्र ! दिव्य धाम पुगेपछि
छुटेँ आखिर आफैँ नै बन्द यो नखुलेपछि ।
एक्लै गयौ तिमी मात्र मलाई बन्द नै गरी
दाता ईश्वरको शोभा कस्तो होला प्रभो हरि ! ।।

सुनेथेँ शक्तिको गाथा दिल्ली ईश्वर दर्शन
नेपाल कसरी राम्रो भन्छन् रे मार्ग दर्शन ।
नेपालीपन बोकेरै जान पाए म जाऊँ नै
तर छुटेँ प्रभो आफू दुःखी छु भित्रभित्र नै ।।

देऊँ आशिष हे दिल्ली मित्रलाई उदार भै
खुलोस् नाका छिटै हाम्रो मन्त्र देऊ अपार नै ।
दिल्ली दर्शन चाँडै नै गर्न पाऊँ स्वयम् पनि
अभागी बन्दले गर्दा छुट्यो सौभाग्य जीवनी ।।

काठमाडौं