नेपाली हास्यव्यङ्ग्य अनलाइन पत्रिका

एक दिन पशुपतिमा
डाक्टरको झै लाम लागेर
नाम लेखाइयो
भविश्य जान्नलाई
हस्त रेखा देखाइयो
ज्योतिषिले भने
तिम्री गर्ल फ्रेन्ड जो तिमीसँग हिड्छिन्
ती तिम्री हुनेवाली श्रीमती होइनन्
तिमीले जो सोचेका छौ तिनी त्यस्तो छैनन्
मारेन बजियाले
जे जस्तो भए पनि मेरो हातमा
गर्ल फ्रेन्ड त गएकी थिइन् साथमा
उनले ठुलठुला आँखा तर्दैथिइन्
खाउँला जस्तै गरी मलाई हेर्दैथिइन्
फेरि ज्योतिषिले भन्यो
घरमा तिमी बिचौल्या रहेछौ
सबका हेला पो भएछौ
तिम्रा बाले कमाएको सम्पति
कि कान्छातिर लाग्ने छ
कि जेठातिर लाग्ने छ
तिमीलाई त साह्रो पो ठग्ने छन्
बाजे तिम्रा अली रहेछन् जाती
तिमी नै रहेछौ उनको प्यारो नाति
दुईचार वटा म्यानपावरमा
ट्राइ गरेपछि अवश्य भिसा लाग्छ
विदेश नगए झन ठुलो ऋण लाग्छ ।
घर गए पछि
हजुर बासँग सबै कुरा गरें
ज्योतिषिको कथा पुरा गरें
हजुर बाले भने
पैसो पनि उसैले लान्छ
दान दक्षिणा पनि उसैले खान्छ
तेरो सप्रे पनि बिग्रे पनि
त्यो बजिया ज्योतिषिको के जान्छ
त्यो ज्योतिषिले जान्ने भए
मलाई हवल्दार बन्छस् भन्थ्यो
तेरो बालाई खरिदार बन्छस् भन्थ्यो
मैले अझै अर्काको जग्गा खन्या हो
तेरो बा बल्ल बल्ल स्कुलको पियन बन्या हो
उसले भन्या जस्तो के हुन्थ्यो
हुने भए ऊ आफै ज्योतिषी किन बन्थ्यो
हेर नाति बरु डक्टरलाई
मुख देखा, नाक देखा
आँखा देखा, दात देखा
तर त्यो ज्योतिषिलाई
हस्त रेखा कहिल्गै नदेखा ।

दाङ, हाल : काठमाडौं