नेपाली हास्यव्यङ्ग्य अनलाइन पत्रिका

काकाको घर गाउँमा पर हावा छ सरर
बिहानैदेखि काममा व्यस्त पसिना तरर ।
भतिजो बस्ने महलबिच सुन्दर सहर
शरीर श्रम कहिलै छैन बास्ना छ हरर ।।

गाउँकै खाना पसिना दाना जीवन काकाको
सुरिलो गीत लेक र बेँसी मारुनी भाकाको ।
भतिजो पिज्जा सेकुवा म म विदेशी बियर
विलासीपन सहरबिच लाग्दै छ गियर ।।

आफन्त नाता सुख र दुख फुर्सद काकाको
धनले भन्दा मनले माथि सहजै नाताको ।
भतिजो साँच्चै दिनहुँ बिजी अफिस पार्टीमा
रगत नाता समाज देन अड्किन्छ घाँटीमा ।।

काका छन् उस्तै पातलै तन फुर्तिला उस्तै छन्
धनले भन्दा मनले गर्ने प्रवृत्ति उस्तै झन् ।
भतिजो मोटो शरीर भारी आलश्य चढेको
धनको लोभ तनको माया हलक्कै बढेको ।।

काकाको रोग खोकी र ज्वरो मौसमी तैपनि
खानमा केही बन्देज छैन रुचेको जेपनि ।
भतिजो आज फुर्सद हुँदा सुगर प्रेसर
कहिले भन्छ अल्सर हो कि लागेछ क्यान्सर ।।

काठमाडौं